John 7

FugagiꞋeta nopi maineꞋya imu negiya kanale YisasiꞋa mogegahe umaine.

1Ani kanafina Yutia kotega vayaꞋmoꞋya haesaya amakesa haviya yafe YisasiꞋa Yutia vai-oꞋayeno Kalili kotega ute ete huno maine. 2Ala kana, fugagiꞋeta nopi maineꞋya imu negiya kana aupa nehie. 3Aupa higeꞋya Yisasina aganaꞋamoꞋya mage huꞋya hapaiye “Ma kumala neꞋataleka Yutia kotega ugeꞋya kakaveꞋma nehaya veala kagayama tokiyakaletiꞋma alina aliꞋyana ageho. 4Nago kanomoꞋa ‘MukiꞋa veaꞋmoꞋya nagesae.’ huno kesi aliꞋyana noꞋalia yane. Kagaya ani tokiya aliꞋyana mukiꞋa ma mopale veaꞋmogami amaufi aligeꞋya ani aliꞋyakaꞋa ageho.” huꞋya hae. 5Hayanagi ani aganaꞋamoꞋya agaifena haviꞋya amakupi maleꞋya amametitia ohunaya yafe ani kea hu-mainae. 6YisasiꞋa mage hie “AliꞋyaniꞋa amave-lisua kanaꞋniꞋa falote ohunegi tamakaya mukiꞋa kanalela tamakaiꞋma tamahaisia kavala hisaya kanatamilelagi afaꞋa haiho. 7Nagai ke nohaviya veaꞋmoꞋya tamakaifena musetami nehagi nagaya ‘Ase ohu kava nehae.’ huꞋna hama-pauva yateti nagaila amaipa kafa he-nenatae. 8Tamakaya Yelusalemu imulega viho. Nagaya aliꞋya kanaꞋniꞋa falote ohuneanagiꞋna ani yafe menia imulega oꞋugahue.” huno hie. 9Ani kea hama-paiteno oꞋuno afaꞋa Kalili kotega maine.

YisasiꞋa imulega umaine.

10AganaꞋamoꞋya imulega ago utageno YisasiꞋa haenaga anilega hai-maine. Vaya amaulela oꞋunegi kesi fala-kino umaine. 11Falakino umainegeꞋya Yuta vayaꞋmoꞋya agayama imuleꞋma esiafene huꞋya moge mege hugetayana higeꞋya mage huꞋya hae “Ani kanoa hanate maine?” huꞋya hamavi-gageꞋya anifima alitalu hu-mainaya veaꞋmoꞋya Yisasifena sumi sumi huꞋya nagoꞋamoꞋya “Kanale kanoe.” huꞋya nehageꞋya nagoꞋamoꞋya “Vaya aye-mavataga hugeno omai kanoe.” nehageꞋya huꞋya hae. 13Hayanagi Yuta vayaꞋmogamife koli haya yafe ani kea ala kea ohunagi osi kefiti sumi sumi huꞋya hu-mainae.

14Ani imu kanamo amuꞋnopinaga YisasiꞋa ala mono nopi haino hu-mave-li-maine. 15Hu-mave-neligeꞋya Yuta veaꞋmoꞋya tusiꞋa amamaꞋyo neꞋaiꞋya mage huꞋya hae “Mani kanoa hana avo nopi uno age-mainea kanomo avopitila taha-nepaiye? Avo nopina oꞋunea kanomoꞋa hanateti ani kea haviline?” huꞋya hae. 16Hageno YisasiꞋa kenonaꞋamia mage huno hama-paiye “Hu-mave-nelua yana nagesafiti tamaha-nopaugi nevaꞋyaꞋma hu-na-tegeꞋna emainoa kanomo naha-pai-mainea ke tamaha-nepauve. 17NagoꞋa veaꞋmoꞋya ‘Anumaya Kotina haisia kava hugahune.’ huꞋyama hisaya veaꞋmoꞋya ma ma hu-lamave-nelua kea nagesafiti tamaha-nepaufi Anumaya KotiꞋa naha-pai-mainea ke tamaha-nepaufi havigahae. 18Havigahayanagi nago kanomoꞋa agaiꞋa agesafiti kema hisia kanomoꞋa ‘Nagai nagi alisaga hisae.’ huno nehianagi nago kanomoꞋma ‘NevaꞋyaꞋma hu-na-tenea kanomo agi alisaga hisae.’ huno hisia kanoa kanale agu agesaene kano mainea yafe havigea ohugahie. 19MoseseꞋa kahegi kea ago tamaha-pai-mainea ke tamakaitamifina nago kanomoga ani kemona akavela nomalane. NaꞋa higetama menia nagaila nahaegahena nehae?” huno hie. 20HigeꞋya melitalu hu-mainaya veaꞋmoꞋya mage huꞋya hae “Kefo avamuꞋmo kagaila kagusafina maineno kavale-liteno nehie. TaꞋya kahaegahena nehageka nehane?” huꞋya hae. 21Hageno YisasiꞋa mage huno hama-paiye “Nagaya nago tokiya aliꞋyama Sapati kanaleꞋma alua aliꞋyafe tamamaꞋyoa neꞋaiye. 22MoseseꞋa nayona ‘NafaꞋnetamimona agoya amega augafaꞋa taga hu-taleho*.’ huno hama-pai-maine. Ani kavala agaiꞋa alino aepa ohenegi Mosesena aginagomoꞋya ani yana aliꞋya aepa he-mainae. NeꞋmoꞋma agoya anoꞋyaꞋa tagama hayana Sapati kanale taga hu-mainae. 23Tamakaya MoseseꞋma kahegi kema oꞋatagaesaya yafe Sapati kanalela neꞋmo agoya anoꞋyaꞋa taga nehayanagi naꞋa higetama nagayama Sapati kanalema nago kanoma mukiꞋa augafama aliꞋna hilatoma hua yafena tamahaiya vai-nena-tae? 24Havigu ke nehae. AfaꞋa amega yate agetetama ‘Kefo kava nehane.’ hutama nehagi tama kava hisigetama agetetama kaiyekea hu-teho.” huno nehie.

VeaꞋmoꞋya “YisasiꞋa hanaꞋa augafa kano maine?” huꞋya havigahe hu-mainae.

25NagoꞋa Yelusalemu mainaya veaꞋmoya YisasiꞋma hia ya ageteꞋya mage hae “Ma kanoa ala vayaꞋmoꞋyama haegahunema haya kanofi? 26Ageho vaya amaulagafina kea nehianagi nago yana hu noꞋatae. Kava vayaꞋmoꞋya ma kanomofe Anumaya KotiꞋa veaꞋmogati taugafa ali-gatigahie huno hu-tegeno emainea kanoa mainea yafe havimainafi? 27Anumaya KotiꞋa taugafama ali-gatigahema hu-tegeno emainea kanomofena ‘Hana kumateti emaine?’ huꞋya hugahayanagi ma kanoma ea kumala ago age-mainone.” huꞋya hae.

28Hageno YisasiꞋa ala mono nopi haino maineno hu-mave-nelino ala kefiti mage huno hie “Tamakaya nagaifena ago havilama hutama nage-mainafi? Nagayama emainoa kumaꞋenefe havimainafi? Nagaya nagaiꞋni nagesafiti omenogi nagaiꞋma hu-natenea kanomoꞋa tokiyaꞋage kano maineanagitama tamakaya agaila oꞋagenae. 29OꞋagenayanagi nagaya agaiꞋene mainoleti hu-nategeꞋna emainoafenagiꞋna ago age-mainoe.” huno hie. 30HigeꞋya agaila atafa hugahe hayanagi falisia kanaꞋa yaufa falote ohunea yafe augafalela nago kanomoꞋa atafa ohune. 31Ohunayanagi mukiꞋa anifima mainaya veaꞋmoꞋya agaifena haviꞋya amakupi maleꞋya mage hae “Anumaya KotiꞋma taugafa ali-gatigahema hu-tenea kanoma esiana ma mainea kanomoꞋma tokiya avame yama hu-mainea kavala agasesifi? AꞋao oꞋagasegahie. Ma kanoa Anumaya KotiꞋma taugafa ali-gatigahema hu-tegeno emainea kano maine.” huꞋya hae.

Ati vayala hu-ma-tageꞋya Yisasina atafa hugahe neꞋae.

32NehageꞋya Falasia vayaꞋmoꞋya agaifema sumi sumiꞋma haya kea haviteꞋya mono note kava vayaꞋene Falasia vayaꞋene ati vayaꞋmogamina hu-ma-tageꞋya Yisasina me haesaya malesaya kava huꞋya avalegahe neꞋae. 33NeꞋageno YisasiꞋa mage huno hie “Osi kana kanoꞋa tamakaiꞋenena maiteꞋna hu-nategeꞋna emainoa kanolega ugahue. 34Tamakaya nagaifena natiyegahayanagi nagaila onagegahae. Visua kumatela tamakaya oꞋugahae.” huno hie. 35HigeꞋya Yuta vayaꞋmoꞋya amakaiꞋamifi huge havige huꞋya mage hae “Agayama ‘Nagaila onagegahaema.’ hia kumala hanamaꞋalegafiga hanegeno nehie? Agaya Kaliki kotega Yuta vayaꞋmogatina tataleꞋya umainaya kotega umaineno Kaliki vea hu-mave-li hamaveli hugahe nehifi? 36Agayama hia kea ‘Tamakaya nagaila natiyegetesayana onagegahae. Visua kumatela oꞋugahae.’ hunoꞋma hia kemo aepaꞋa naꞋane huno nehie?” huꞋya hae.

YisasiꞋa ofalita maige maige hisuna tife hu-maine.

37Imu kime haiꞋya mogi haꞋnoma haya kana tusiꞋa ala kanae. Ani kanale YisasiꞋa he-tino ala kefiti mage hu-maine “NagoꞋa veaꞋma tifema amakesia veala nagaite eꞋya tina me neho. 38NagoꞋa veaꞋmoꞋya nagaife haviꞋya amakupi maleꞋya amametitia hisayana Anumaya Koti autaꞋmafina ani veaꞋmofe mage hu-maineane

‘Ofali tina kasagoꞋya timo aguꞋafina hava-te-maineno vali-lavino tavigahie.’ huno hu-maineane.” huno nehie.
39YisasiꞋa anima hia kea “Alu Aotage AvamuꞋamofe hu-maine.” Ani Alu Aotage Avamula Yisasifema haviꞋya amakupi malesaya vaya amamite amamite hugahe nehie. Ani kema hia kanafina YisasiꞋa yaufa ikapinaga ohainea yafe Alu Aotage AvamuꞋamoꞋa yaufa omenegeno hu-maine.

VeaꞋmoꞋya agaifena tolefi ali fako hu-mainae.

40NagoꞋa alitalu hu-mainaya veaꞋmoya ani kea haviteꞋya mage hae “Tamage-lafa huno mani kanoa Anumaya Koti aune kano emaine.” huꞋya hae. 41HageꞋya nagoꞋa veaꞋmoꞋya “Anumaya KotiꞋa taugafa ali-gatigahe hu-tenea kano maine.” nehageꞋya nagoꞋa veaꞋmoꞋya “Anumaya KotiꞋa taugafa ali-gatigahe hu-tenea kanomoꞋa Kalilitila falote ohugahie. 42Anumaya Koti autaꞋmafina mage huno kae-maleneane

‘Anumaya KotiꞋa taugafa ali-gatigahema hu-tenea kanoa Tevitina aginagomo egahie. TevitiꞋma Petelehemu nemaiya kumate ategahie.’ huno kae-maleneane.” huꞋya nehae.
43Ani veaꞋmoꞋya agaifena tolefi ali fako huꞋya alu ke alu ke nehae. 44HageꞋya nagoꞋamoꞋya “Agaila atafa hiho.” huꞋya hayanagi nago kanomoꞋa augafalela atafa ohune.

Mono note kava vayaꞋmoꞋya Yisasifena haviꞋya amametiti nohae.

45Ati vayala eteꞋya mono note kava vayateꞋene Falasia vayateꞋene vageꞋya mage huꞋya hamavigae “NaꞋa higetama avaletama nomae?” huꞋya hae. 46HageꞋya ati vayaꞋmoꞋya mage huꞋya hae “YisasiꞋma hia kea nayona nago kanoꞋmoꞋa aniꞋa augafa kea ohigeta ohavinona yafe avaleta nomone.” huꞋya hae. 47HageꞋya Falasia vayaꞋmoꞋya mage hae “TamakaiꞋenena ago aye-lamavataga hu-mainefi? 48Ifi nagoꞋa kava vayapi Falasia vayapi ‘Yisasifena haviꞋya amakupi maleꞋya amameti hu-mainae.’ huꞋya haya kea havimainafi? 49AꞋao kava vayala aniꞋa ohunagi kahegi kema ohaviꞋyama alitaluma hu nemaiya veaꞋmogamina Anumaya KotiꞋa hai vai-ma-teno haniki-mainesia yapina hu-mategahie.” huꞋya hae. 50Hageno NikotimasiꞋa nayoma YisasiteꞋma emainea kanomoꞋa amakaipi maineanagino mage hie “Tagai mono kemoꞋa mage huno hie ‘Hagotetama nofiꞋma hu-tesaya kanomona ‘NaꞋa maꞋa humainoe.’ huno hisia kea havitetama kefo kavaꞋma hu-mainesia kanomona nofila huteho.’ huno hu-maineane.” huno nehie. 52NehigeꞋya “Kagaya kagaiꞋenena Kaliliti kano mainapi? Anumaya Koti ke kae-malenaya kefina hapalika havilama huteka kagaiꞋenena havio Kaliliti nagola aune kano omegahie.” huno hu-maineane huꞋya nehae. 53NehageꞋya mukiꞋa veaꞋmoꞋya atagu-feꞋya ataleꞋya kumaꞋamilega ute ete hu-mainae.